اللى بيحترم بيحترم نفسه
شهدت حركة مترو الأنفاق مساء الخميس 24 نوفمبر
ارتباك شديد بسبب إضراب عدد كبير من السائقين
اعتراضا على حبس زميل لهم
إثر نشوب مشادة بينه وبين أحد القضاه
وقد نشبت المشادة بين سائق القطار والقاضى
بسبب محاولة القاضى الركوب فى كابينة القيادة
إلا أن السائق رفض مما دفع القاضى لتحرير محضر ضده
بقسم الأزبكية قال فيه إنه تعرض للاعتداء من السائق
مما تسبب فى تحطيم نظارته
فأمرت النيابة بحبس السائق 4 أيام
إلى هنا والخبر المنشور بأهرام الجمعة خلص

اتكلم أنا بقه

أما والله دي حاجة حلوة أوي
الراجل.. (السواق يعني) صحى من نومه الصبح
(أمال يعني هيصحى بالليل)
غسل وشه
شرب شاى بربرى (بحليب يعني
صبح ع الولية والعيال
وقال لها عايزة حاجة وانا جاي.
قالت له تسلم (دي مراته لا مؤاخذة
وقام واخد ديله ف سنانه وطار على شغله
أحسن دول شغلهم بالمواعيد يابويا
ربنا يعينه
المهم.. في آخر الوردية كده
وهو بيفكر بقى لما يروَح لأم العيال
يا ترى عاملة أكل إيه
اممممم
مصيبة لا تكون ماعملتش أكل زي امبارح
وإيه يعني يا عم
ما انت برضه ما سيبتلهاش فلوس
(ده السواق بيكلم نفسه)
ولا يهمك هتدبر.. كلها يومين ونقبض
وهتبقى عسل
وفجأة

ابتلاه ربنا بمصيبة في محطة غمره
تا تا تا تااااااا

دخل عليه الكابينة إنسان
متأنعر ع الفاضي زي ما تقول كده
عبدالسلام النابلسي بس مبعجر
وقال له إنت يا بنا آدم
وسع بريحتك الوحشة دي
خلليني اقعد مكانك
أحسن المترو زحمة ومليان بشر
إنت مش شايف..
جتكو البلاوي مليتو البلد..
بجم..
السواق يا عيني بص يمين وشمال
ما لاقاش حد غيره ف الكابينة..
بلع ريقه وجمد أعصابه وقال...
إنت بتكلم مين يا حضرت؟
قال القاضي
بكلمك انت يا حيوان
هو في حمار غيرك هنا يا بجم
وسع ما عنديش وقت

فما كان من السواق إلا أن رفض بشدة
(متهيأ لي من حقه)
عشان ماطولش عليكم
عايز تعليقاتكم
عشان اعرف مين اللي غلطان؟؟

السواق؟

الباشا (القاضي يعني)؟

ولا وكيل النيابة اللي جامل القاضي
وحبس السواق 4 أيام؟

ولا النظام؟؟

ولا المترو؟؟

وأخيرا
إلعبي يا ألعاب..

شكرا