لو لم أكن أهلاوياً؟

لو لم أكن أهلاوياً؟؟؟ كنت أشجع مين؟؟
سؤال صعب أوي
في حد جرب يسأل السؤال ده لنفسه
***
السؤال للجماعة الأهلاوية طبعاً
سألت نفسي السؤال ده
***
مش عايز أبالغ و اقول مالقيتش إجابة
بس لقيت السؤال صعب شوية
***
يمكن كنت شجعت الاسماعيلي؟؟
ممممممممم
فريق الإسماعيلي جامد وبيقدم كورة حلوة

بس لأ
الكورة الجميلة مش كل حاجة
***
يمكن كنت شجعت الزمالك
***
ياراجل
مش للدرجادي
***

تيم الأهلي مش الكورة الجميلة بس اللي بتميزه
يمكن عشان الأهلي فريق بطولاته كتير وشبه محتكر بطولات مصر وأفريقيا
يمكن - بس برضه لأ
أنا بشجع الأهلي من ونا صغير
وماكانش بيفوز بالكم الهائل من البطولات زي الأيام دي
***
افتكر واحنا صغيرين كان غالباً الأهلي بيلعب ماتشاته يوم الجمعة
وكنا ننتظر الساعة تيجي 3 بفارغ الصبر
وطبعاً قبل الماتش بيكون فيه تجهيزات
مش تجهيزات - يعني ممكن تسموها طقوس

نصحى يوم الجمعة الصبح
(مش عارف أبويا كان مصر يصحينا بدري ليه)
وبعدين نفطر فول وطعمية
(ماهو طول الأسبوع سندوتشات جبنه ف المدرسة)
وبعدين تيجي صلاة الجمعة
وبعدين نتفرج ع الشيخ الشعراوي
وبعدين نتغدى
***
التفاصيل دي كلها بتحصل والماتش بتاع الأهلي في الدماغ
يعني منتهى الاستمتاع والله - أنا بتكلم عن نفسي

وممكن قراءة جرايد الجمعة مثلا
اقصد صفحات الرياضة طبعاً وبالذات الجمهورية
هي كانت شوية زملكاوية بس ما علينا
***
وبعدين بقى تيجي اللحظة المرتقبة
ونسمع التتر الشهير بتاع الماتشات ف التليفزيون
وبعدها يطل علينا كابتن لطيف الزملكاوي
بس والله وقتها ماكنتش اعرف انه زملكاوي
لأنه كان فعلا راجل محايد
وبعدين بقي نتفرج ع الماتش
افتكر كان كباتن الأهلي وقتها

كابتن مصطفى عبده - المجري
وحسام البدري وصفوت عبدالحليم وطاهر الشيخ وجمال عبدالحميد وإكرامي - وحش أفريقيا
وفتحي مبروك وفوزي سكوتي ومصطفي يونس
وبعدين جه مجدي عبد الغني - مقشة
وزكريا ناصف وربيع ياسين وحمدي أبو راضي وأسامة عرابي وعلاء ميهوب
وطاهر أبو زيد (أحسن لاعب كرة قدم) - بعد بيبو من وجه نظري
هذا بالإضافة إلى كابتن كباتن مصر وأفريقيا والشرق الأوسط
والشرق اللي مش أوسط
محمود الخطيب
*** بيبو ***
(علي فكرة أنا مسمي البلوج بتاعي على إسمه)
وبنتي كمان إسمها حبيبة وبدلعا - بيبو - زي محمود الخطيب

وللأسف أنا ماتفرجتش على الكابتن حسن حمدي
بس أسمع إن لقبه كان وزير الدفاع
وكان محترم داخل الملعب وخارجه
***
عايز أقولكم حاجة متأكد منها
الناس دي كانت ولا زالت بتحب الأهلي
عارفين يعني بتحب الأهلي

يعني الأهلي نمرة واحد في حياة كل واحد من الناس دي
لاعبين ومدربين ومجلس إدارة
وأي حاجة تانية تبقي نمرة اتنين
***
عرفتوا الأهلي جاب نجاحه منين
عرفتوا الأهلي وصل للمكان ده ازاي
عشان اللي بيديروا النادي بيحبوه
***
خدوا بالكوا من النقلة اللي جاية دي

والسؤال دلوقت
لو الحكومة الحالية + الحكومات اللي قبلها
أقصد كمية الحكومات والتشكيلات الوزارية الجديدة والقديمة اللي كانت تدير مصر من زمااان
لو الحكومات دي بتحب مصر زي النادي الأهلي
كانت مصر وصلت لفين؟؟؟؟؟

يا جماعة حبو مصر زي ماحنا بنحب الأهلي
يا إما تستقيلوا من مناصبكم وسيبوا أماكنكم للي بيحب البلد دي

ولا نشوف لنا إحنا بلد تانية نحبها
بس بشرط
***
يكون فيها أهلي