إيه رأيك فى سعر اللحمة؟

بداية.. السلام عليكم ورحمة الله وبركاته
سمعت نكتة مش عارف هتعجبكم ولا لأ
احكيهالكم من باب العلم بالشئ
أو من باب الاستظراف
***
النكتة بتقول إن فى واحد أمريكاني سأل سؤال واحد لتلت أشخاص
شخص سعودي - والتاني سوداني - وأخونا التالت كان مصري

السؤال بيقول: إيه رأيك فى سعر اللحمة؟
السعودي قال: يعني إيه سعر؟
والسوداني قال: يعني إيه لحمة؟
أما المصري فقال: يعني إيه رأي؟؟؟

تخيلو ياخواننا
مابقيناش عارفين نقول رأينا ولا نتصرف بحرية
هو أصلا يعني إيه حرية؟
***
انتخابات مجلس الشعب بتتزور أو بيشتروا الأصوات بالفلوس
انتخابات المحليات بالبلطجة
حتي انتخابات اتحاد الطلبة فيها مشاكل وضرب وعسكر
***
ده حتي ربنا لما خلق آدم
خلقه وحط قدامه الشجرة
وقال له ماتاكلش من الشجرة دي
***
ربنا كان يقدر يبعده عن الشجرة
مثلا يخليها طويلة أوي عشان ماياكلش منها
لأ ربنا خلاها قدامه وقال له انت حر
***
أظن لو الشجرة دي موجودة اليومين دول
كان وزير الداخلية عمل عليها كردون عساكر أمن مركزي
وإخواننا بتوع الكهربا يحوطوها بسلك شائك ويكهربو السلك
والشجرة دي لو في منطقة سكنية كان أزالو المباني ورموا الناس في الشارع
ويا سلام بقي لما يكون معالي الوزير (أى وزير) بنته هتتجوز
طبعا هيعملو الفرح تحت الشجرة بقي
ماهي كوسة
حتي الكوسة في الشجرة كمان
***
هيطلعلي واحد فكيك دلوقتي يقولي
بلاش النظرة التشاؤمية دي
وبص لنص الكوباية المليان
***
مليان إيه يامولانا
ياجماعة الكوباية طلعت فاضية
والله العظيم فاضية